تجربتي في البحث عن عمل في ألمانيا

العمل في ألمانيا 

#تجربتى_فى_البحث_عن_عمل ..

#ألمانيا

و انا طالع من مصر ومعايا شهادة C1 من معهد جوتة , كان جوايا ثقة انى أول ما هروح ألمانيا هلاقى وظيفة بالكتير قوى فى أول شهر ..ودا نظرا للاحتياج الكبير للاطباء اللى كنت بسمع عنه و أنا لسه ف مصر ..

وصلت ألمانيا الجمعة 15-5 -2015 ونزلت على شقة مع اتنين أصدقاء مصريين فى ولاية النوردراين بغرب ألمانيا و كانوا هما كمان بيدوروا على وظيفة زى حالاتى .. قعدت فيها شهر ونص ..

بدأت من تانى يوم الوصول أبعت ايميلات لكل رؤساء الأقسام فى كل المستشفيات الالمانية .. بدأت الأول أراسل على عظام على أمل انه ممكن ألاقى وظيفة فيه رغم انه صعب شوية لأن المنافسة عليه شديدة حتى من الألمان نفسهم واحنا اللغة بتاعتنا بتكون ضعيفة فى الأول .. وبعد كده بدأت أراسل على كل التخصصات ..

عدى أسبوع ..أسبوعين .. شهر .. كنت ببعت كل يوم حوالى 100-150 ايميل وللاسف الردود كلها كانت سلبية وناس كتير مكانتش بترد أصلا ..

قلت بدل منا قاعد فاضى كده أحجز معاد لامتحان مهارات التواصل مع المريض .. أهو يحسن من فرصتنا شوية.. وأخدت معاد فعلا يوم 28-6 ..

فى الشهر التانى بدأت تجيلى بعض الردود بالموافقة على عمل مقابلة عشان يتعرفوا عليا واتعرف عليهم ويشوفوا لغتى عاملة ازاى .. أول مقابلة كانت ف مستشفى تأهيل قسم العظام فى ولاية تورنجن بشرق ألمانيا .. وكانت الأسوأ على الاطلاق بالنسبالى لأنى أول مرة أعمل مقابلة فى حياتى أصلا وكمان بالالمانى .. فكان مستوايا اللغوى ضعيف جدا ..وخرجت منها وأنا متأكد انهم مش هيقبلونى لان كان معايا بنت من شرق اوروبا متقدمة هى كمان ولغتها قوية جدا .. فأكيد اختاروها هى يعنى .. الحمد لله ..

بعدها بأسبوع جاتلى مقابلة تانية عند رئيس قسم مصرى تخصص قلب فى ولاية هيسين بوسط ألمانيا .. وكانت المقابلة كلها بالعربي .. قالى الصراحة انا كنت عاوز اتعرف عليك فبعتلك لكن أنا معنديش حاليا وظيفة فاضية بس ممكن تيجى تعمل عندى تدريب وتقعد فى سكن المستشفى أوفرلك من السكن فى شقة على حسابك .. شكرته واخدت تلفونه ومشيت ..

تانى يوم كان عندى مقابلة عصبية فى ولاية هيسين ..بس دى كانت تليفونية .. الشيف مكانش مباشر معايا فى الرد وسابنى معلق وقال خلص الامتحان وابعتلى الشهادة ونتكلم تانى ..

فى اليوم اللى بعده رحت مقابلة نفسية فى ولاية تورنجن فى الشرق تانى ولكن رئيس القسم اشترط انه قبل مايرد عليا أروح تدريب الأول لمدة أسبوع وأسكن فيه على حسابى فى فندق فرفضت بعدها لانى مكنتش مستريحله ..

ف يوم 22-6 كان عندى مقابلة فى ميونخ ..جراحة عمود فقرى .. وسافرت من أقصى الغرب لأقصى الجنوب .. وكانت المقابلة عشر دقايق .. الشيف كان مفكر من أسمى أنى سعودى وهاجى اشتغل عنده بمنحة من السعودية وهو مش هيدفع حاجة .. وللأسف أكتشف انى مصرى ف المقابلة ف اتلكك باللغة .. ومشيت .. فى اليوم ده قعدت ألف فى شوارع ميونخ والدنيا مضلمة فى وشى .. قعدت ادور على مسجد لأنى كنت عاوز أعيط جامد ..كنا فى رمضان وصايم وسفر حوالى 8 ساعات بالقطار و ف الاخر المقابلة كانت سيئة .. لقيت مسجد ودخلت اتوضيت وقعدت أبكى بكاء شديد و أكلم ربنا وأقوله أنا واثق فيك يارب .. أنا عارف انك مش هتخذلنى وانك هتجبر بخاطرى .. كان يوم لا ينسى ..

ركبت القطار من ميونخ أقصى الجنوب الى مدينة لايبزج أقصى الشرق لأن تانى يوم كان عندى مقابلة نفسية هناك .. قضيت الليل فى محطة من ضمن المحطات وانا قاعد على البلاط والجو كان بيمطر مطر شديد .. وصلت تانى يوم لمستشفى النفسية وعملت المقابلة وكانت مبشرة جدا .. بس ردوا عليا بعدها بفترة طويلة جدا بالرفض ..

يوم 28-6 دخلت الامتحان فى جامعة هايدلبرج ونجحت الحمد لله والشهادة بعتوهالى بالايميل تانى يوم ..

لقيت السكن اللى قاعد فيه على حسابى هيخلص رصيدى ومش بتكلم مع حد من الألمان واللغة هتضيع منى ف اتصلت بالشيف المصرى وقلتله انى هاروحله تدريب وأقعد عنده فى المستشفى أوفرلى ومنها ألاقى حد اتكلم معاه عشان اللغة تتحسن شوية .. وأثناء الفترة دى كنت بستأذنه لو عندى مقابلات بأروحها عادى ..

المهم .. توالت المقابلات زى ما أنتو شايفين فى الورقة اللى تحت دى اللى كنت بدون فيها مواعيد المقابلات والردود بتاع الناس عليها .. رحت مقابلات فى شمال المانيا وفى الشرق وفى الغرب والوسط والجنوب .. وللاسف تذاكر القطارات هنا غالية جدا وخاصة مع المسافات البعيدة .. فكانت المقابلة الواحدة ممكن تكلفنى ما يعادل ألف جنية أو ألف ونص .. الحمد لله على كل حال ..

عملت 16 مقابلة واترفضت فيهم كلهم .. و مكنتش عارف السبب ايه .. لأن لغتى كانت زى كل الناس اللى بتتقبل فى وظايف ويمكن كانت احسن كمان .. بس معرفش .. أكيد ربنا كان له حكمة معينة من التعب اللى تعبته فى المشاوير الطويلة دى ..

طوال الفترة دى كنت دايما حسن الظن بالله ودائم الدعاء ان ربنا يوفقنى .. وفى قرارة نفسي حاسس ان ربنا مش هيخذلنى .. لكن بعد المقابلة ال 16 بدأت أضعف .. تسلل اليأس الى قلبى بحكم انى بشر .. دخلت فى دور اكتئاب حاد .. احساس الفشل تملكنى وسيطر عليا .. فضلت كام يوم نايم مش عاوز أصحى عشان مفكرش انى خلاص هرجع مصر تانى بعد ما فقدت معظم فلوسى اللى غبت خمس سنين أحوش فيها .. جه عليا وقت فكرت فى الانتحار من كتر الضغط النفسى الشديد اللى كنت فيه .. فكرت فعلا انى أرمى نفسى من الدور ال12 اللى كنت ساكن فيه فى سكن المستشفى .. لكن بفضل الله ثم كلام أبويا معايا تراجعت ..لأنه كان دايما يحسسنى ان انا لو رجعت مش هكون فاشل فى نظره ..بالعكس .. دى تجربة وخضتها وأكيد استفدت منها ..

بعد كده عملت أربعة مقابلات .. ويشاء السميع العليم انى اتقبل فيهم كلهم و أنا قاعد فى المقابلة .. ودى حاجة نادرة ان الألمان يدوك الرد فى ساعتها كده .. بس حسيت ان دى رسالة من ربنا ليا .. ان مع العسر يسرا ..

اتقبلت فى تأهيل عظام ف مستشفى خاصة ونفسية فى مستشفى حكومى اللى انا فيها دى والاتنين دول فى ولاية بايرن وطب عام فى الصليب الأحمرمع اللاجئين فى ولاية تورنجن ونفسية تانية فى ولاية هيسين ..

استخرت ربنا سبحانه وتعالى ووازنت بين بعض الامور كحجم المدينة .. وفيها مسلمين ومساجد ولا لأ .. ووضع السكن والمطاعم وكده .. وحجم المستشفى وظروف الناس اللى هشتغل معاهم ايه فى كل مستشفى منهم .. وربنا هدانى فى الاخر لوظيفة النفسية اللى أنا شغال فيها حاليا فى مستشفى من أكبر مستشفيات ولاية بايرن فيها جميع التخصصات النفسية وفترة الاختصاص كلها كاملة فيها الحمد لله ..

طبعا الناس بتشوفك انك شغال دلوقتى فى المانيا .. لكن محدش شافك وانت مقضى اليوم كله فى القطارات وجت عليك أوقات كنت بتقضى الليل كله قاعد على كرسي خشب فى المحطة وعمال تعمل مقابلات وتترفض .. محدش شافك وانت بتبكى بدل الدموع دم وبتتذل لربنا أنه ما يردكش خايب لبلدك تانى .. محدش شافك وانت يائس وعلى بعد خطوة واحدة بس من الانتحار ..

تجربة صعبة جدا .. و مؤلمة .. بعت فيها 2450 ايميل ولكن يأبى الله الا أن يجيب دعائى ودعاء أبويا وأمى ويجبر بخاطرى وميخيبش تعبى ويكرمنى بناس جميلة جدا .. بحبهم وبيحبونى .. صحيح تخصص غير تخصصى اللى كنت شغال فيه ف مصر .. بس الهدف بتاعى كان انى ألاقى وظيفة هنا واستقر ..وقد تحقق الحمد لله .. سهل فيما بعد لو حبيت أغير ولو حبيت أكمل برضه مفيش مشكلة ..وخاصة انى أكتشفت أنه تخصص لذيذ جدا جدا بعد ما كنت واخد عنه فكرة وحشة فى مصر ..

#في_أمريكا_والدول_المتقدمة

#منقول

المصدر: 

https://www.facebook.com/photo.php?fbid=10154018688400579&set=a.10150150065140579.332035.751895578&type=3