الفرق بين ماليزيا واندونيسيا
ماليزيا بلد شكلها حلو وراقي شوارعها واسعة باين عليها التنظيم
اندونيسيا ، خليني اتكلم عن جاكرتا العاصمة ، أشبه بالقاهرة ، البلد تحسها قديمة وعتيقة ومبهدلة باين عليها البؤس حتى المناطق الغنية تحسها مبهدلة والتراب واضح عليها ، شبه القاهرة بكل ما تحمله الكلمة .. الفرق الوحيد انها انضف من حيث الزبالة .. متلاقيش زبالة في الشارع ، والفرق التاني انهم هنا بيستخدمو الموتوسيكلات بشكل اساسي حتى في المواصلات تقدر تركب اوبر موتور عامل زي اوبر وكاريم للعربيات
خارج جاكرتا ، مناطق ارياف ، والريف اجمل وارقى واهدأ طبعا من المدينة ، وان كانت الشوارع أضيق وفي حشرات اكتر زي الريف عندنا بس انضف وكل منطقة ريفية ليها مميزات في شكل المباني والعادات احيانا
ماليزيا شعبها ، خليني اتكلم عن الماليزيين (المالاي) شعب إتم والبيض بيبظ من وشه ، ميبتسمش ف وشك غير لو في حاجة غالبا بيكون هو الغلطان ويبتسم ف وشك .. متكبرين عشان حساسين أن بلدهم قوية والحكومة بتديهم تمييز دايما على غيرهم حتى على الماليزيين من اصول تانية زي الصينيين والهنود طبعا
اندونيسيا شعبها لطيف جدا وعلى وشه ابتسامة حتى منغير حاجة وفريندلي تعمل منهم صحاب بسهولة
انا قعدت في ماليزيا 11 شهر مطلعتش بصديق ماليزي واحد .. قعدت في اندونيسيا شهر طلعت باربع خمس اصدقاء وكل حتة اروح فيها سهل جدا تهزر مع الناس وتتصاحب عليهم
ماليزيا يعرفوا انجليزي عموما كويس ، بس انجليزي هندي/صيني ، انجليزي قميء
اندونيسيا نادر جدا ما تلاقي حد بيعرف انجليزي ، بس انجليزي مفهوم وخفيف ع الودان ، غالبا بستعمل جوجل ترانسليشن عشان افهّم اللي قدامي انا عايز ايه .. ونسبة منهم يعرفو عربي العربية الفصحى
ماليزيا باين عليها الوساخة الاخلاقية .. من حيث الخمور والنسوان عريانين بشكل كبير والصينيين واخدين راحتهم في اللبس القصير والضيق وغيره
اندونيسيا الاحتشام والحجاب فيها اكتر بكتير ، والصينيين هنا رغم قوتهم الاقتصادية بس ملمومين أخلاقيا
طبعا كل بلد فيها عاهراتها اللي عايز السكة دي هيلاقي منها كتير انا بتكلم عن المظهر العام
اندونيسيا لو انت متدين متحسش بالقرف لما تمشي في الشارع .. ماليزيا تحس بالقرف فعلا وتكره تنزل اصلا من شكل القذارة
ماليزيا فيها عرب اكتر وبالتالي فرص العمل في ماليزيا مع العرب اكتر ، حتى لو ظروف العمل سيئة -ارزاق-
اندونيسيا العمل فيها صعب جدا عشان العرب قليلين ومتبعترين وميعرفوش انجليزي ففرصتك في العمل اقل بكتير من ماليزيا
ماليزيا اشهر من ناحية السياحة وهما مهتمين بالجانب ده كويس
اندونيسيا فيها اماكن جنة وروعة بس الحكومة مش مهتمين بيها بالعكس الحكومة وصلت بالفساد انها تخصخص وتبيع الجزر الجميلة للاثرياء خاصة الصينيين لانهم بيدفعو فوري
ماليزيا بتديلك 3 شهور فيزا سياحة بدون مقابل ، بس الاقامة فيها صعبة وغالية ، نادر ما تلاقي حد مستعد يسجلك على شركة حتى لو هياخد منك فلوس ، وغالبا إقامة العمل بتبقى سنة واحدة وتمنها الفين دولار ، زيها زي إقامة الدراسة /بكالوريوس او ماجستير) كل سنة بالفين دولار برضو تقريبا ولازم تحضر بشكل منتظم عشان ميضيقوش عليك في الفيزا
اندونيسيا بتديلك شهر واحد سياحة وممكن تجدد شهر كمان اضافي ب60 دولار .. إقامة العمل صعبة بس لو لاقيت هل فهي ارخص من ماليزيا تقريبا الف دولار ، نفس الكلام إقامة الدراسة تعملها الف دولار في السنة
في ماليزيا لو اشتغلت في وظيفة مع عربي (وده غالبا مستقبلك) هتاخد 400 دولار بدون اي حقوق توظيف الا لو معاك إقامة وعامل معاه عقد موثق .. طبعا ال400 دولار دول لو انت محظوظ واخدتهم هيروح تلات تربعهم في السكن والاكل والمواصلات ، اقل سكن هنا غرفة واحدة ب100 دولار ف ظروف غالبا سيئة ، او 200 دولار شهريا في غرفة ومكان احسن
في اندونيسيا تقدر تلاقي سكن نضيف غرفة اسمها كوست ب120 دولار او اقل كمان ، لكن في المقابل لو انت اشتغلت هنا المتوسط بتاعك 300 دولار ، شهريا بتاكل بحوالي 100 دولار .. تقريبا نفس ماليزيا بس نسبة وتناسب
طبعا في ظلم كتير بيحصل خاصة في ماليزيا أن حد يديلك اقل من 400 دولار او يديلك المبلغ بشرط انك تسكن قريب مثلا مع العمال البنغال وغيرهم وظروف سيئة جدا
في حالة أن حد عملك إقامة على حسابه (على حساب شركته وانت هتشتغل معاه) بيعتبرها أشبه بالاستعباد انك بتفضل تشتغل عنده هو بس لآخر الزمان والا هيقطع الاقامة بتاعتك ف لحظة وتبقى انت كدة مخالف .. وفي ناس كتير بترفض أنه صاحب العمل يعمله إقامة على حساب العمل نفسه ويروح يعمل إقامة على حسابه الشخصي عند حد تاني عشان يبقى حر نفسه
في وظائف بتقبض فيها احسن حوالي 500 دولار او اكتر شوية بس دي نادر جدا لو جاتلك وده في ماليزيا بس طبعا ، اندونيسيا انت غالبا هتلقط رزقك من كذا وظيفة وعمل حر عشان تطلع بمبلغ كويس في الآخر
بالنسبة للمشاريع المشاريع في البلدين فاشلين وحرام تحط فلوسك ف أي مشروع سواء ماليزيا او اندونيسيا ، الا في حالات زي يكون معاك فلوس فائض او فلوس انت مستعد تخسرها او مستعد تنتظرها فترة طويلة لحد ما تجيبلك دخل وغالبا هيبقى دخل بسيط ولازم انت تتابعه كويس بنفسك عشان النصب في البلدين خاصة ماليزيا احتراف وانت بتلعب في ملعب دولي يعني نصابين محترفين دوليين غير الشغل المحلي بتاع مصر
في ناس بتشتغل مواسم يعني موسم الرز مثلا يروج للرز ، موسم السياحة ينزل يأجر عربية ويلف بيها ، موسم التزاوج ينزل يتجوز واحدة ياخد بيها إقامة
وده الموضوع التاني
الجواز في ماليزيا صعب ومنصحش بيه، الماليزية إتمة ومتكبرة ومعرفش حد متجوز ماليزية ومبسوط الا اللي بيتكسف يقولك انه محطوط عليه حطة وحشة
الجواز في اندونيسيا اسهل بكتير ، تقريبا لسا مشافوش وساخة العرب اللي شافها الماليزيين ، والاندونيسية اطيب وان كانت الخلافات الثقافية والعادات والتقاليد وغيره بيسبب مشاكل جامدة بس ممكن الطرفين يتغلبوا على المشكلة دي لو هما عايزين خاصة الست طبعا لان الراجل غالبا في الحالة دي بيتجوزها غصب حتى لو جميلة ومحترمة بس عقلية العرب عموما بتبص للمرأة على انها خدامة وللآسياوية بالذات على انها أمة وهو متجوزها عشان الاقامة ويمشي حاله بمعارفها ، مش انه بيحبها او بيحب الآسياويات او شايفها مؤهلة انها تشرفه قدام غيره
ماليزيا فيها رشوة وفساد بس ليه حدود وفي أوقات معينة النظام الماليزي بيشدد على المخالفين وكاسرين الفيزا ويرحلهم او يسجنهم
اندونيسيا الرشوة والفساد اكتر بس غالية
ماليزيا فيها رطوبة عالية جدا وحر ، المطر بيخفف شوية بس مش كل المناطق بيبقى فيها مطر
اندونيسيا الجو فيها احسن بكتير ، لكن هتقابلك مشكلة الدخان والتلوث عشان كدة هتلاقي اغلب الناس لابسين كمامات
في دائما ظروف أسوأ وأحسن ، انا بتكلم عن الشخص اللي خرج بدون عقد عمل / خرج يدور على عمل زي اغلب الشباب
منصحش حد متجوز انه يخوض التجربة دي لانك يادوب هتكفي نفسك لو معاك أسرة لازم تاخد ضعف المرتبات دي
عايز تستثمر فلوسك مع حد ده حوار تاني منصحكش بيه برضو الا لما تكون فاهم كويس جدا
انصح واحد اعزب صغير مستعد يتبهدل عشان يستمتع بالسفر ويشوف الدنيا وخاصة اللي مش بيفكر في الجواز قريب لانك لو بتفكر في الجواز جنوب شرق اسيا مش هيخدمك
وانصحه لو حابب يتبهدل يجي ماليزيا وخلي اندونيسيا backup عشان لو اتزنق يجي جاكرتا
جنوب شرق اسيا يخدمك انك تبدأ من الصفر لو بلدك مش عارف تجيب فيها الصفر ده .. يعني لو ايام مبارك مثلا هقولك خليك في مصر واللي هتتعبه برة اتعبه عندك عالاقل بين اهلك وصحابك .. بس في ظروف السيسي الحياة بقت تحت الصفر وانت بتعافر عشان تجيب الصفر .. يبقى لا اطلع جنوب شرق اسيا وابدأ من الصفر .. الصفر جاهز هنا تبدا منه ،
والنهاية مش هتبقى انك تعمل قرشين زي اوروبا زمان ، النهاية انك تعيش مستريح بس .. تسكن وتاكل وتشرب وتتفسح بس ، مش هتحوش حاجة ، الا لو ضغطت نفسك في الاكل والشرب والفسح والرفاهيات ساعتها هتحوش (ده لما تقعدلك كام سنة هنا) ، وساعتها ممكن تتجوز ، ومراتك اسياوية بتشتغل وتساعد معاك في البيت او مراتك في مصر بتشتغل ومكفية نفسها
في حاجة مهما لازم تفهمها اخيرا وهي أن الحياة ارزاق مش لازم عشان حد نجح يبقى انت هتنجح زيه او فشل يبقى انت هتفشل زيه .. كل واحد ليه تجربته واسلوب حياته
وانت اللي بترسم هدفك وبتمشي فيه حاطط ف اعتبارك دينك ومبادئك وحدودك اللي مش هتتخطاها وشكل حياتك اللي تحبه بعيدا عن كلام الناس ، لو انت مبسوط كدة في الحلال يبقى طز في كلام الناس
نصيحتي الأخيرة متبقاش من الناس القذرة اللي مسوّئين سمعة المسلمين والعرب والمصريين برة .. خليك انت النضيف عشان آخرتك وعشان نفسك -النضيف الناس بتحترمه وتحبه وسمعته بتشيله لما فلوسه بتروح- وعشان غيرك ميتضرش بسبب اخلاقك الزبالة في الغربة
المهم دي نظرة عامة للي حابب يعرف اكتر الظروف هنا
#جنوب_شرق_آسيا
#ماليزيا
#إندونيسيا
المرة الجية الصين وكوريا الجنوبية وتايلند وفيتنام 😍😁
